Pwy all ymuno ag UCM?
Mae eich hundeb myfyrwyr yn penderfynu ymaelodi ag UCM ar sail barn yr aelodau unigol. Mae Ymaelodi ag UCM yn galluogi eich hundeb i fuddsoddi mewn mudiad cenedlaethol yn ogystal â manteisio ar yr amrediad eang o wasanaethau 'rydym yn eu cynnig. Dyma rai o'r manteision a ddaw i'ch myfyrwyr pan fo'ch hundeb yn ymaelodi ag UCM:
Llais cenedlaethol cryf ac effeithiol
Fel grwpiau eraill megis nyrsys ac athrawon, mae myfyrwyr angen llais cenedlaethol i sicrhau eu bod yn cael eu cynrychioli'n llawn. Mae UCM yn bodoli i hyrwyddo, amddiffyn ac ymestyn hawliau myfyrwyr.
O addysg ddi-dâl i brescripsiwn am ddim, o hawliau myfyrwyr anabl i'r rheiny sydd mewn llety ar rent tra'u bod yn astudio, byddwn wastad yn gosod buddiannau myfyrwyr wrth galon ein gweithgareddau wrth i ni ymgyrchu dros newid.
Mae nifer cynyddol o undebau myfyrwyr yn penderfynu bod yn aelodau o UCM yn bennaf oherywdd y gynrychiolaeth a'r gefnogaeth yma.
Gyda mwy na phedwar-ugain mlynedd o brofiad ymgyrchu, gallwn wneud y gorau o'ch hymgyrchoedd drwy lobïo ar raddfa genedlaethol a threfnu cynrychiolaeth swyddogol i gyrff cenedlaethol. Byddwn yn parhau i godi ymwybyddiaeth o ymgyrchoedd UCM ymhlith gwleidyddion a pharhau i wella ein perthynas gyda'r cyfryngau.
Cynyddu gallu undebau myfyrwyr
Ein nod yw gwneud pob undeb myfyrwyr mor gryf a gweithgar â phosibl, gan adeiladu sgiliau, cefnogi swyddogion unigol a gweithredu ar lefel genedlaethol i amddiffyn eu statws a'u hanibyniaeth.
'Rydym yn helpu undebau yn eu gwaith drwy'r ymchwil 'rydym yn ei wneud, yr hyfforddiant 'rydym yn ei gynnig i swyddogion myfyrwyr, y defnyddiau 'rydym yn eu cynhyrchu a'r dogfennau 'rydym yn eu cyhoeddi. Mae hyn i bob diben fel bod â thîm ychwanegol o fwy na 50 o staff a 25 o swyddogion etholedig i gynorthwyo eich myfyrwyr a'ch hundeb myfyrwyr.
Cymorth i fyfyrwyr wrth ganfod eu traed
Mae UCM yn darparu gwsanaethau yn uniongyrchol i fyfyrwyr unigol drwy ein gwefan, nus.org.uk, ar ffurf gwybodaeth ac adnoddau sy'n berthnasol i bob myfyriwr. Mae hyn yn cynnwys cyngor ar dai a llety, cyllid myfyrwyr, setlo i mewn a wythnos y Glas, amrywioldeb a llawer o bynciau eraill.
Cynnig bargeinion i fyfyrwyr drwy gardiau NUS Extra
Mae cerdyn NUS Extra yn cynnwys dros 80 o ostyngiadau cenedlaethol, sydd ar gael ar-lein neu ar y stryd fawr, ac amcangyfrifir ei fod yn arbed cymaint â £189 y flwyddyn ar gyfartaledd i bob myfyriwr unigol.
Mae ymchwil annibynnol a gynhaliwyd yn ystod 2006/07 wedi canfod fod 80% o ddeiliaid cerdyn NUS Extra yn fodlon â'r gwasanaeth, ac y byddent yn argymell y cerdyn i ffrindiau. Yn ogystal â hyn, drwy godi tâl bychan, mae NUS Extra yn darparu incwm i undebau myfyrwyr.
Gwneud i'ch harian fynd ymhellach drwy Wasanaethau UCM
Mae Gwasanaethau UCM, sef cangen fasnachol UCM, yn prynu ar y cyd er mwyn cadw prisiau'n isel a denu cwmnïau mawrion i hyrwyddo eu nwyddau er budd bariau, bwytai a siopau mewn undebau myfyrwr.
Gall yr arbedion a wneir o ganlyniad i fargeinio cenedlaethol gan gwmni Gwasanaethau UCM ar nwyddau megis cwrw, gwinoedd a gwirodydd, fod gymaint - neu hyn yn oed yn fwy - na thâl ymaelodaeth ag UCM, sydd i bob diben yn golygu y gallwch ymaelodi ag UCM am ddim.
Llynedd, 'roedd rhanddalwyr Gwasanaethau UCM ar eu budd o £5.3miliwn. Daeth yr elw yma yn sgil prynu, masnachu trwyddedig, adwerthu, adloniant a ffioedd ymaelodaeth.